Асноўны від дзейнасці дзяцей малодшага школьнага ўзросту — гульня, у працэсе якой развіваюцца духоўныя і фізічныя сілы дзіцяці, яго ўвага, памяць, уяўленне, дысцыплінаванасць, спрыт. Менавіта таму ў адукацыйным працэсе выкарыстанню гульняў і гульнявых прыёмаў на ўроках матэматыкі ўдзяляю вялікую ўвагу.
Характар гульнявых момантаў розны. Так, у 1—2 класах больш выкарыстоўваю сюжэтна-ролевыя гульні з удзелам дзяцей, а ў 3—4 класах — гульні, звязаныя з развіццём лагічнага мыслення, мовы, вылічальных навыкаў, творчага ўяўлення, кемлівасці.
Лічу, што гульнявая дзейнасць асабліва неабходна на ўроках у 1—2 класах, бо дзеці не могуць доўга затрымліваць увагу на падручніку, ім хутка надакучвае аднастайнасць. Вучні цяжка разумеюць загады, забароны, яны імкнуцца да гульнявой дзейнасці. Гульня для іх — сэнс жыцця, яны не могуць жыць без актыўнасці.
Вялікую ролю адводжу ўрокам-казкам з казачнымі сюжэтамі, вобразамі. Праз казачныя элементы можна стварыць займальныя сітуацыі. Сустрэча дзяцей з казачнымі героямі не пакідае іх абыякавымі. Яны жадаюць дапамагчы герою, які трапіў у бяду, разабрацца ў казачнай сітуацыі. Усё гэта стымулюе разумовую дзейнасць дзіцяці, развівае яго цікавасць. Урокі-казкі нясуць вялікую вучэбную ролю.
У 3—4 класах я прапаную дзецям урокі-падарожжы. Яны абвастраюць увагу, назіральнасць, асэнсаванне гульнявых задач, аблягчаюць пераадоленне цяжкасцей і дасягненне поспеху. Прычым важнае значэнне ў арганізацыі такіх урокаў мае іх пачатак. Неабходна настроіць дзяцей на працоўны лад. Менавіта для гэтага і можна выкарыстоўваць прыём у форме гульні на пачатку ўрока:
— Залатое цуда-сонца!
Загляні да нас у ваконца!
Нам здароўе зберажы,
І лічыць дапамажы.
Вучні перадаюць цяпло, якое дасылае сонейка праз акно ў клас, дотыкамі далоняў сваім сябрам, пералічваюць умовы, неабходныя для добрай работы на ўроку.
На прыпынку “Займальны” выкарыстоўваю нестандартныя формы праверкі дамашняга задання, якія садзейнічаюць развіццю дапытлівасці, кемлівасці, творчых адносін да працы. З задавальненнем дзеці любяць звяраць свае адказы з адказамі мудрай Савы, Грамацея і іншых казачных герояў. Самаправерка дамашняга задання па ўзоры на дошцы дазваляе кожнаму дзіцяці адчуць сябе паспяховым.
Пры актуалізацыі ведаў на прыпынку “Матэматычная размінка” таксама важна прымяняць розныя віды дзейнасці праз гульню: “Маўчанка”, “Упрыгож ёлачку шарамі”, “У лясной школе”, “Вясёлы лік”, гульня-эстафета “Хто правільна і хутчэй”, “Збор пладоў”, “Паштальён” і інш. Тут жа выкарыстоўваю ланцужкі прыкладаў, лагічныя задачы, задачы на кемлівасць і ў вершах, загадкі, розны геаметрычны матэрыял у гульнявой форме, што спрыяе развіццю лагічнага мыслення, павышае цікавасць дзяцей да выканання заданняў.
Пры рабоце над новай тэмай забяспечваю парнае, групавое і франтальнае ўзаемадзеянне, выкарыстоўваючы элементы гульні і спаборніцтва.
На кожным уроку нельга абмінуць прыпынак “Гульнявая паляна”, на якім дзеці разам з настаўнікам праводзяць аздараўленчую фізкультпаўзу для зняцця стамляльнасці, што таксама спрыяе падтрымцы эмацыянальнага настрою ў класе. Разам з прагаворваннем вершаў дзеці імітуюць розныя рухі.
Падчас замацавання вучэбнага матэрыялу малодшыя школьнікі з задавальненнем уліваюцца ў гульні-практыкаванні: віктарыны, крыжаванкі, рэбусы і інш.
На ўроку для кожнага вучня стараюся ствараць сітуацыю поспеху, што таксама спрыяе павышэнню матывацыі і падтрымцы пазнавальнай цікавасці да вучобы. Пры пастаноўцы пытанняў і вызначэнні заданняў на ўроку ўлічваю індывідуальныя асаблівасці вучняў, даю толькі станоўчую характарыстыку вынікаў іх дзейнасці, што стымулюе дзяцей і павышае іх актыўнасць на ўроку перад казачнымі персанажамі.
На прыпынку “Выніковы” гульні з разнастайнымі формамі і відамі работы дазваляюць хутка вызначыць, наколькі глыбока засвоена новая тэма на ўроку, замацаваць веды, а таксама вызначыць недахопы. У гульні вучні ахвотна пераадольваюць цяжкасці, развіваюць уменне аналізаваць сваю дзейнасць, ацэньваць свае ўчынкі і магчымасці. Напрыклад, гульня “Футбол”. Клас дзеліцца на дзве каманды. Затым дзеці рашаюць прыклады. Залічваецца гол з правільным адказам. Такім чынам, для дзяцей рашэнне прыкладаў з’яўляецца гульнёй, а не цяжкай працай.
Завяршальным этапам уяўляецца падвядзенне і ацэньванне вынікаў урока. Пры ацэньванні адказаў вучняў выкарыстоўваюцца спецыяльна распрацаваныя для гэтага ўрока крытэрыі (складаецца дрэва поспеху). Прапаную вучням работу, заснаваную на прыёме “Апрані дрэва”. Калі выканалі ўсё правільна — наклейваюць зялёны лісточак, калі адна памылка — жоўты, калі больш — аранжавы.
Прымяненне нетрадыцыйных форм урокаў, у прыватнасці, урока-падарожжа, — гэта магутны стымул у навучанні, разнастайная і моцная матывацыя. Такія ўрокі актывізуюць дзейнасць вучняў, робяць успрыманне больш актыўным, эмацыянальным, мысленне творчым, самастойным, гнуткім.
Нягледзячы на тое, што ўрок пабудаваны ў форме гульні-падарожжа, усе этапы ўзаемазвязаны паміж сабой. Выкарыстаныя гульнявыя метады і прыёмы забяспечваюць рацыянальнае размеркаванне працоўнага часу і папярэджанне перагрузак вучняў. На такім уроку прысутнічае атмасфера сутворчасці і супрацоўніцтва.
Сёння можна з упэўненасцю сказаць: гульнявыя формы і метады навучання ў сукупнасці з традыцыйнай адукацыяй ствараюць тое асяроддзе, у якім фарміруецца высокаматываваная, творчая асоба. Прагрэс патрабуе ад настаўніка вырашэння ўсё новых і новых адукацыйных задач, а задача настаўніка заключаецца ў пошуку шляхоў іх вырашэння.
Валянціна ДОМАШ,
настаўніца пачатковых класаў Навасёлкаўскай сярэдняй школы Ляхавіцкага раёна Брэсцкай вобласці.